Juma'a 15 ga Sha'aban 1435	Bugu na 1133	ISSN 1595-4474

Wani Jami’in gwamnatin Bornon ya shaida wa manema labarai cewa, sun sami labarin aukuwar lamarin, amma ba za su iya tabbatar da shi ba.

Rahotanni sun ce lamarin ya auku ne a wata Rugar Fulani da ke kusa da Chibok, inda wasu ’yan bindiga suka yi awon gaba da su, kamar yadda daya daga cikin shugabannin Fulani da ya nemi a sakaya sunansa ya bayyana wa manema labarai ta wayar tarho.

Ya ce, “Al’amura suna faruwa da matanmu na Fulani; kafin ma maganar sace wadannan matan Fulani, akwai mata wadanda ake daukewa, a samu mazajensu a ce sai sun ba da shanu kamar 30 ko 40 kafin a sako wadannan matan. Yau bai wuce kwana biyar ba da aka sako wata mata da aka dauka bayan an kai shanun da suka ce dole sai an ba da.”

Sannan ya ce, “a yanzu haka ma akwai mata guda 40 da aka tafi da su da aka bi gida-da-gida aka debe su. Amma abin kowa na jin tsoro, ba kowa zai iya fitowa ya ce an sace mana mutane ba. Wadanda aka tabbatar mana dai mata arba’in ne.”

Haka kawai ake bi gida-gida ana daukar su? “Suna zuwa da makamai ne su ce a fito, a fito. Bayan an tara mutane, sai su tantance. Ba a daukar tsofaffi, sai dai a duba wacce ta haihu daya, biyu, uku, sai a hada a tafi da su. A ce ku ku yi nan, sai a tafi da su.”

An tambaye shi, su wane ne ke sace matan? “To, wallahi mutane ne dai suke zuwa da makamai da yawa, kuma za ka gan su da yunifom na soja.”

Amma wani Jami’in gwamnatin Borno ya ce, a labarin da suka samu mata 20 aka sace, amma suna ci gaba da yin bincike.

Ita kuwa gwamnatin Tarayyar Nijeriya, a ta bakin Shugaban Cibiyar ba da bayanai kan tsaro, Mike Omiri, ta ce, ba ta san da labarin ba. “A gaskiya mu ba mu samu labarin ba. Labarin da muka samu shi ne na sojojin Nijeriya da suka yi yaki da wadannan ’yan boko Haram a Vital kusa da Chibok din.