Sharifai da dama ne suka gabatar da jawabai a wannan wuri. Cikin jawabin da ya gabatar, Sharif Ma’aruf, wanda kuma ya yiwo takakka daga Kano, ya bayyana cewa duk wani abu da mutum zai yi a duniyar nan, musamman a cikin addini, in ba ya yi tare da soyayyar Iyalan gidan Annabi (S) ba, to ya yi aikin banza, domin Allah ba zai kalle shi ba.

Da yake magana game da Sayyida Fatima (AS) kuwa, Sharif Ma’aruf cewa ya yi, “addinin Musulunci nata ne, Allah nata ne, Manzon Allah nata ne, Hasan nata ne, Husaini nata ne, ita kanta Aljanna tata ce, duniya tata ce, lahira tata ce, alkiyama da barzahu, duk nata ne.”

Saboda haka sai Sharifin ya bayyana cewa babu yadda za a yi mutum ya samu tsira duniya da lahirarsa, ba tare ya nuna soyayya gare ta da mahaifinta, mijinta da ’ya’yanta ba. Yana mai cewa haka kuma babu tantama, duk makiyinta, ba shi ba rahamar Allah ranar lahira, duk wanda ya cutar da ita dan wuta ne.

Ita kuwa Sharifiya Marya cewa ta yi Iyalan gidan Annabi ne tsirar duk wani mai neman tsira, kamar yadda yake kuma babu tsira ga duk wanda bai kama su ba. Ta ce “wallahi da ba don Fatima ba da ’ya’yayenta, da sai dai a tattara a zuba a wuta.

Shi ma Sharif Al’alawi, wanda ya yiwo takakka daga Kano, ya yi nasa jawabin ne shi ma cikin darajoji da falalolin da Allah ya yi wa Ahlul Baiti (AS).